25. Tuvaradāyakavaggo

25. Tuvaradāyakavaggo

open all | close all

1. Tuvaradāyakattheraapadānaṃ

1.

‘‘Migaluddo pure āsiṃ, araññe kānane ahaṃ;

Bharitvā tuvaramādāya [bharitvā turavamādāya (ka.), bhajjitaṃ tuvaramādāya (?) ettha tuvaranti muggakalāyasadisaṃ tuvaraṭṭhinti tadaṭṭhakathā; tuvaro dhaññabhedeti sakkatābhidhāne], saṅghassa adadiṃ ahaṃ.

2.

‘‘Ekanavutito kappe, yaṃ dānamadadiṃ tadā;

Duggatiṃ nābhijānāmi, tuvarassa idaṃ phalaṃ.

3.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā tuvaradāyako thero imā gāthāyo abhāsitthāti.

Tuvaradāyakattherassāpadānaṃ paṭhamaṃ.

2. Nāgakesariyattheraapadānaṃ

4.

‘‘Dhanuṃ advejjhaṃ katvāna, vanamajjhogahiṃ ahaṃ;

Kesaraṃ ogataṃ [osaraṃ (syā.), osaṭaṃ (sī.)] disvā, patapattaṃ samuṭṭhitaṃ.

5.

‘‘Ubho hatthehi paggayha, sire katvāna añjaliṃ;

Buddhassa abhiropesiṃ, tissassa lokabandhuno.

6.

‘‘Dvenavute ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

7.

‘‘Tesattatimhi kappamhi [sattasattatime kappe (syā.)], satta kesaranāmakā;

Sattaratanasampannā, cakkavattī mahabbalā.

8.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā nāgakesariyo thero imā gāthāyo abhāsitthāti.

Nāgakesariyattherassāpadānaṃ dutiyaṃ.

3. Naḷinakesariyattheraapadānaṃ

9.

‘‘Jātassarassa vemajjhe, vasāmi jalakukkuṭo;

Addasāhaṃ [athaddasaṃ (sī. syā.)] devadevaṃ, gacchantaṃ anilañjase.

10.

‘‘Tuṇḍena kesariṃ [kesaraṃ (syā.)] gayha, vippasannena cetasā;

Buddhassa abhiropesiṃ, tissassa lokabandhuno.

11.

‘‘Dvenavute ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

12.

‘‘Tesattatimhi kappamhi, satta kesaranāmakā [satapattasanāmako (sī. syā.)];

Sattaratanasampannā, cakkavattī mahabbalā.

13.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā naḷinakesariyo thero imā gāthāyo abhāsitthāti.

Naḷinakesariyattherassāpadānaṃ tatiyaṃ.

4. Viravapupphiyattheraapadānaṃ

14.

‘‘Khīṇāsavasahassehi, niyyāti lokanāyako;

Viravapupphamādāya [viravipupphaṃ paggayha (sī.)], buddhassa abhiropayiṃ.

15.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

16.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā viravapupphiyo thero imā gāthāyo abhāsitthāti.

Viravapupphiyattherassāpadānaṃ catutthaṃ.

5. Kuṭidhūpakattheraapadānaṃ

17.

‘‘Siddhatthassa bhagavato, ahosiṃ kuṭigopako;

Kālena kālaṃ dhūpesiṃ, pasanno sehi pāṇibhi.

18.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, dhūpadānassidaṃ [buddhapūjāyidaṃ (sī.)] phalaṃ.

19.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā kuṭidhūpako thero imā gāthāyo abhāsitthāti.

Kuṭidhūpakattherassāpadānaṃ pañcamaṃ.

6. Pattadāyakattheraapadānaṃ

20.

‘‘Paramena damathena, siddhatthassa mahesino;

Pattadānaṃ mayā dinnaṃ, ujubhūtassa tādino.

21.

‘‘Catunnavutito kappe, yaṃ dānamadadiṃ tadā;

Duggatiṃ nābhijānāmi, pattadānassidaṃ phalaṃ.

22.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pattadāyako thero imā gāthāyo abhāsitthāti.

Pattadāyakattherassāpadānaṃ chaṭṭhaṃ.

7. Dhātupūjakattheraapadānaṃ

23.

‘‘Nibbute lokanāthamhi, siddhatthamhi naruttame;

Ekā dhātu mayā laddhā, dvipadindassa tādino.

24.

‘‘Tāhaṃ dhātuṃ gahetvāna, buddhassādiccabandhuno;

Pañcavasse paricariṃ, tiṭṭhantaṃva naruttamaṃ.

25.

‘‘Catunnavutito kappe, yaṃ dhātuṃ pūjayiṃ tadā;

Duggatiṃ nābhijānāmi, dhātupaṭṭhahane phalaṃ.

26.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhātupūjako thero imā gāthāyo abhāsitthāti.

Dhātupūjakattherassāpadānaṃ sattamaṃ.

8. Sattalipupphapūjakattheraapadānaṃ

27.

‘‘Satta sattalipupphāni, sīse katvānahaṃ tadā;

Buddhassa abhiropesiṃ, vessabhumhi naruttame [vibhattivipallāso cintetabbo].

28.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

29.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sattalipupphapūjako thero imā gāthāyo abhāsitthāti.

Sattalipupphapūjakattherassāpadānaṃ aṭṭhamaṃ.

9. Bimbijāliyattheraapadānaṃ

30.

‘‘Padumuttaro nāma jino, sayambhū aggapuggalo;

Catusaccaṃ pakāseti, dīpeti amataṃ padaṃ.

31.

‘‘Bimbijālakapupphāni [bimbajālakapupphāni (ka.)], puthu katvānahaṃ tadā;

Buddhassa abhiropesiṃ, dvipadindassa tādino.

32.

‘‘Aṭṭhasaṭṭhimhito kappe, caturo kiñjakesarā;

Sattaratanasampannā, cakkavattī mahabbalā.

33.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā bimbijāliyo thero imā gāthāyo abhāsitthāti.

Bimbijāliyattherassāpadānaṃ navamaṃ.

10. Uddālakadāyakattheraapadānaṃ

34.

‘‘Kakudho nāma nāmena, sayambhū aparājito;

Pavanā nikkhamitvāna, anuppatto mahānadiṃ.

35.

‘‘Uddālakaṃ gahetvāna, sayambhussa adāsahaṃ;

Saṃyatassujubhūtassa, pasannamānaso ahaṃ.

36.

‘‘Ekattiṃse ito kappe, yaṃ pupphamabhipūjayiṃ;

Duggatiṃ nābhijānāmi, pupphadānassidaṃ phalaṃ.

37.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā uddālakadāyako thero imā gāthāyo abhāsitthāti.

Uddālakadāyakattherassāpadānaṃ dasamaṃ.

Tuvaradāyakavaggo pañcavīsatimo.

Tassuddānaṃ –

Tuvaranāganaḷinā, viravī kuṭidhūpako;

Patto dhātusattaliyo, bimbi uddālakena ca;

Sattatiṃsati gāthāyo, gaṇitāyo vibhāvibhi.

 

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

 

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)