35. Ekapadumiyavaggo

35. Ekapadumiyavaggo

open all | close all

1. Ekapadumiyattheraapadānaṃ

1.

‘‘Padumuttaro nāma jino, sabbadhammāna pāragū;

Bhavābhave vibhāvento, tāresi janataṃ bahuṃ.

2.

‘‘Haṃsarājā tadā homi, dijānaṃ pavaro ahaṃ;

Jātassaraṃ samogayha, kīḷāmi haṃsakīḷitaṃ.

3.

‘‘Padumuttaro lokavidū, āhutīnaṃ paṭiggaho;

Jātassarassa upari, āgacchi tāvade jino.

4.

‘‘Disvānahaṃ devadevaṃ, sayambhuṃ lokanāyakaṃ;

Vaṇṭe chetvāna padumaṃ, satapattaṃ manoramaṃ.

5.

‘‘Mukhatuṇḍena paggayha, pasanno lokanāyake [vippasannena cetasā (syā.)];

Ukkhipitvāna gagaṇe [ukkhipitvā nalāṭena (ka.)], buddhaseṭṭhaṃ apūjayiṃ.

6.

‘‘Padumuttaro lokavidū, āhutīnaṃ paṭiggaho;

Antalikkhe ṭhito satthā, akā me anumodanaṃ.

7.

‘‘‘Iminā ekapadumena, cetanāpaṇidhīhi ca;

Kappānaṃ satasahassaṃ, vinipātaṃ na gacchasi’.

8.

‘‘Idaṃ vatvāna sambuddho, jalajuttamanāmako;

Mama kammaṃ pakittetvā, agamā yena patthitaṃ.

9.

‘‘Satasahassito kappe, yaṃ kammamakariṃ tadā;

Duggatiṃ nābhijānāmi, buddhapūjāyidaṃ phalaṃ.

10.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ekapadumiyo thero imā gāthāyo abhāsitthāti.

Ekapadumiyattherassāpadānaṃ paṭhamaṃ.

2. Tīṇuppalamāliyattheraapadānaṃ

11.

‘‘Candabhāgānadītīre , ahosiṃ vānaro tadā;

Addasaṃ virajaṃ buddhaṃ, nisinnaṃ pabbatantare.

12.

‘‘Obhāsentaṃ disā sabbā, sālarājaṃva phullitaṃ;

Lakkhaṇabyañjanūpetaṃ, disvā attamano ahuṃ.

13.

‘‘Udaggacitto sumano, pītiyā haṭṭhamānaso;

Tīṇi uppalapupphāni, matthake abhiropayiṃ.

14.

‘‘Pupphāni abhiropetvā, vipassissa mahesino;

Sagāravo bhavitvāna [gamitvāna (sī.), namitvāna (ka.)], pakkāmiṃ uttarāmukho.

15.

‘‘Gacchanto paṭikuṭiko, vippasannena cetasā;

Selantare patitvāna [papatitvā (syā. ka.)], pāpuṇiṃ jīvitakkhayaṃ.

16.

‘‘Tena kammena sukatena, cetanāpaṇidhīhi ca;

Jahitvā mānusaṃ dehaṃ [purimaṃ jātiṃ (?) upari 38 vagge tatiyāpadāne evameva dissati], tāvatiṃsamagacchahaṃ.

17.

‘‘Satānaṃ tīṇikkhattuñca, devarajjaṃ akārayiṃ;

Satānaṃ pañcakkhattuñca, cakkavattī ahosahaṃ.

18.

‘‘Ekanavutito kappe, yaṃ pupphamabhipūjayiṃ;

Duggatiṃ nābhijānāmi, buddhapūjāyidaṃ phalaṃ.

19.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tīṇuppalamāliyo [tiuppalamāliyo (sī.)] thero imā gāthāyo abhāsitthāti.

Tīṇuppalamāliyattherassāpadānaṃ dutiyaṃ.

3. Dhajadāyakattheraapadānaṃ

20.

‘‘Tisso nāma ahu satthā, lokajeṭṭho narāsabho;

Tayopadhikkhaye [tassopadhikkhaye (sī.)] disvā, dhajaṃ āropitaṃ mayā.

21.

‘‘Tena kammena sukatena, cetanāpaṇidhīhi ca;

Jahitvā mānusaṃ dehaṃ, tāvatiṃsamagacchahaṃ.

22.

‘‘Satānaṃ tīṇikkhattuñca, devarajjaṃ akārayiṃ;

Satānaṃ pañcakkhattuñca, cakkavattī ahosahaṃ.

23.

‘‘Padesarajjaṃ vipulaṃ, gaṇanāto asaṅkhiyaṃ;

Anubhomi sakaṃ kammaṃ, pubbe sukatamattano.

24.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, dhajadānassidaṃ phalaṃ.

25.

‘‘Icchamāno cahaṃ ajja, sakānanaṃ sapabbataṃ;

Khomadussena chādeyyaṃ, tadā mayhaṃ kate phalaṃ.

26.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā dhajadāyako thero imā gāthāyo abhāsitthāti.

Dhajadāyakattherassāpadānaṃ tatiyaṃ.

4. Tikiṅkaṇipūjakattheraapadānaṃ

27.

‘‘Himavantassāvidūre, bhūtagaṇo nāma pabbato;

Tatthaddasaṃ paṃsukūlaṃ, dumaggamhi vilaggitaṃ.

28.

‘‘Tīṇi kiṅkaṇipupphāni, ocinitvānahaṃ tadā;

Haṭṭho haṭṭhena cittena, paṃsukūlaṃ apūjayiṃ.

29.

‘‘Ekattiṃse ito kappe, yaṃ kammamakariṃ tadā;

Duggatiṃ nābhijānāmi, tiṇṇaṃ pupphānidaṃ phalaṃ.

30.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tikiṅkaṇipūjako thero imā gāthāyo abhāsitthāti.

Tikiṅkaṇipūjakattherassāpadānaṃ catutthaṃ.

5. Naḷāgārikattheraapadānaṃ

31.

‘‘Himavantassāvidūre , hārito nāma pabbato;

Sayambhū nārado nāma, rukkhamūle vasī tadā.

32.

‘‘Naḷāgāraṃ karitvāna, tiṇena chādayiṃ ahaṃ;

Caṅkamaṃ sodhayitvāna, sayambhussa adāsahaṃ.

33.

‘‘Catuddasasu kappesu, devaloke ramiṃ ahaṃ;

Catusattatikkhattuñca, devarajjaṃ akārayiṃ.

34.

‘‘Catusattati [sattasattati (sī.)] kkhattuñca , cakkavattī ahosahaṃ;

Padesarajjaṃ vipulaṃ, gaṇanāto asaṅkhiyaṃ.

35.

‘‘Ubbiddhaṃ bhavanaṃ mayhaṃ, indalaṭṭhīva uggataṃ;

Sahassathambhaṃ atulaṃ, vimānaṃ sapabhassaraṃ.

36.

‘‘Dve sampattī anubhotvā, sukkamūlena codito;

Gotamassa bhagavato, sāsane pabbajiṃ ahaṃ.

37.

‘‘Padhānapahitattomhi , upasanto nirūpadhi;

Nāgova bandhanaṃ chetvā, viharāmi anāsavo.

38.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā naḷāgāriko thero imā gāthāyo abhāsitthāti.

Naḷāgārikattherassāpadānaṃ pañcamaṃ.

6. Campakapupphiyattheraapadānaṃ

39.

‘‘Himavantassāvidūre, jāpalo [cāpalo (sī.), chāpalo (syā.)] nāma pabbato;

Buddho sudassano nāma, vihāsi pabbatantare.

40.

‘‘Pupphaṃ hemavantaṃ [hemavataṃ (sī.), hemavaṇṇaṃ (syā.)] gayha, gacchaṃ vehāyasenahaṃ;

Addasaṃ virajaṃ buddhaṃ, oghatiṇṇamanāsavaṃ.

41.

‘‘Satta campakapupphāni, sīse katvānahaṃ tadā;

Buddhassa abhiropesiṃ, sayambhussa mahesino.

42.

‘‘Ekattiṃse ito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

43.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā campakapupphiyo thero imā gāthāyo abhāsitthāti.

Campakapupphiyattherassāpadānaṃ chaṭṭhaṃ.

7. Padumapūjakattheraapadānaṃ

44.

‘‘Himavantassāvidūre , romaso nāma pabbato;

Buddhopi sambhavo nāma, abbhokāse vasī tadā.

45.

‘‘Bhavanā nikkhamitvāna, padumaṃ dhārayiṃ ahaṃ;

Ekāhaṃ dhārayitvāna, puna bhavanupāgamiṃ.

46.

‘‘Ekanavutito kappe, yaṃ pupphamabhiropayiṃ;

Duggatiṃ nābhijānāmi, buddhapūjāyidaṃ phalaṃ.

47.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā padumapūjako thero imā gāthāyo abhāsitthāti.

Padumapūjakattherassāpadānaṃ sattamaṃ.

Terasamaṃ bhāṇavāraṃ.

8. Tiṇamuṭṭhidāyakattheraapadānaṃ

48.

‘‘Himavantassāvidūre, lambako nāma pabbato;

Upatisso nāma sambuddho, abbhokāsamhi caṅkami.

49.

‘‘Migaluddo tadā āsiṃ, araññe kānane ahaṃ;

Disvāna taṃ devadevaṃ, sayambhuṃ aparājitaṃ.

50.

‘‘Vippasannena cittena, tadā tassa mahesino;

Nisīdanatthaṃ buddhassa, tiṇamuṭṭhimadāsahaṃ.

51.

‘‘Datvāna devadevassa, bhiyyo cittaṃ pasādayiṃ;

Sambuddhaṃ abhivādetvā, pakkāmiṃ uttarāmukho.

52.

‘‘Aciraṃ gatamattaṃ maṃ, migarājā apothayi [aheṭhayi (sī. syā.)];

Sīhena pothito [pātito (sī. syā.)] santo, tattha kālaṅkato ahaṃ.

53.

‘‘Āsanne me kataṃ kammaṃ, buddhaseṭṭhe anāsave;

Sumutto saravegova, devalokaṃ agañchahaṃ.

54.

‘‘Yūpo tattha subho āsi, puññakammābhinimmito;

Sahassakaṇḍo satabheṇḍu, dhajālu haritāmayo.

55.

‘‘Pabhā niddhāvate tassa, sataraṃsīva uggato;

Ākiṇṇo devakaññāhi, āmodiṃ kāmakāmahaṃ.

56.

‘‘Devalokā cavitvāna, sukkamūlena codito;

Āgantvāna manussattaṃ, pattomhi āsavakkhayaṃ.

57.

‘‘Catunnavutito kappe, nisīdanamadāsahaṃ;

Duggatiṃ nābhijānāmi, tiṇamuṭṭhiyidaṃ phalaṃ.

58.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tiṇamuṭṭhidāyako thero imā gāthāyo abhāsitthāti.

Tiṇamuṭṭhidāyakattherassāpadānaṃ aṭṭhamaṃ.

9. Tindukaphaladāyakattheraapadānaṃ

59.

‘‘Kaṇikāraṃva jotantaṃ, nisinnaṃ pabbatantare;

Addasaṃ virajaṃ buddhaṃ, oghatiṇṇamanāsavaṃ.

60.

‘‘Tindukaṃ saphalaṃ disvā, bhinditvāna sakosakaṃ [sakoṭakaṃ (sī.), sakoṭikaṃ (syā.)];

Pasannacitto sumano, sayambhussa madāsahaṃ [vessabhussa adāsahaṃ (sī.)].

61.

‘‘Ekanavutito kappe, yaṃ phalamadadiṃ tadā;

Duggatiṃ nābhijānāmi, phaladānassidaṃ phalaṃ.

62.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tindukaphaladāyako thero imā gāthāyo abhāsitthāti.

Tindukaphaladāyakattherassāpadānaṃ navamaṃ.

10. Ekañjaliyattheraapadānaṃ

63.

‘‘Romaso [revato (sī.)] nāma sambuddho, nadīkūle vasī tadā;

Addasaṃ virajaṃ buddhaṃ, pītaraṃsiṃva bhāṇumaṃ.

64.

‘‘Ukkāmukhapahaṭṭhaṃva , khadiraṅgārasannibhaṃ;

Osadhiṃva virocantaṃ, ekañjalimakāsahaṃ.

65.

‘‘Catunnavutito kappe, yaṃ añjalimakāsahaṃ;

Duggatiṃ nābhijānāmi, añjaliyā idaṃ phalaṃ.

66.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekañjaliyo thero imā gāthāyo abhāsitthāti.

Ekañjaliyattherassāpadānaṃ dasamaṃ.

Ekapadumiyavaggo pañcatiṃsatimo.

Tassuddānaṃ –

Padumī uppalamālī, dhajo kiṅkaṇikaṃ naḷaṃ [kiṅkaṇiko naḷo (sī.)];

Campako padumo muṭṭhi, tindukekañjalī tathā;

Cha ca saṭṭhi ca gāthāyo, gaṇitāyo vibhāvibhi.

 

 * Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

 

 

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)