22. Hatthivaggo

22. Hatthivaggo

open all | close all

1. Hatthidāyakattheraapadānaṃ

1.

‘‘Siddhatthassa bhagavato, dvipadindassa tādino;

Nāgaseṭṭho mayā dinno, īsādanto urūḷhavā.

2.

‘‘Uttamatthaṃ anubhomi, santipadamanuttaraṃ;

Nāgadānaṃ [aggadānaṃ (sī. ka.)] mayā dinnaṃ, sabbalokahitesino.

3.

‘‘Catunnavutito kappe, yaṃ nāga [dāna (sī. ka.)] madadiṃ tadā;

Duggatiṃ nābhijānāmi, nāgadānassidaṃ phalaṃ.

4.

‘‘Aṭṭhasattatikappamhi, soḷasāsiṃsu khattiyā;

Samantapāsādikā nāma, cakkavattī mahabbalā.

5.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā hatthidāyako thero imā gāthāyo abhāsitthāti.

Hatthidāyakattherassāpadānaṃ paṭhamaṃ.

2. Pānadhidāyakattheraapadānaṃ

6.

‘‘Āraññikassa isino, cirarattatapassino [jhāyino, mettacittatapassino (syā.)];

Buddhassa [dhammassa (syā. ka.)] bhāvitattassa, adāsiṃ pānadhiṃ ahaṃ.

7.

‘‘Tena kammena dvipadinda, lokajeṭṭha narāsabha;

Dibbayānaṃ [sabbaṃ yānaṃ (sī.)] anubhomi, pubbakammassidaṃ phalaṃ.

8.

‘‘Catunnavute ito kappe, yaṃ kammamakariṃ tadā;

Duggatiṃ nābhijānāmi, pānadhissa idaṃ phalaṃ.

9.

‘‘Sattasattatito kappe, aṭṭha āsiṃsu khattiyā;

Suyānā nāma nāmena, cakkavattī mahabbalā.

10.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pānadhidāyako thero imā gāthāyo abhāsitthāti.

Pānadhidāyakattherassāpadānaṃ dutiyaṃ.

3. Saccasaññakattheraapadānaṃ

11.

‘‘Vessabhū tamhi samaye, bhikkhusaṅghapurakkhato;

Deseti ariyasaccāni, nibbāpento mahājanaṃ.

12.

‘‘Paramakāruññapattomhi, samitiṃ agamāsahaṃ;

Sohaṃ nisinnako santo, dhammamassosi satthuno.

13.

‘‘Tassāhaṃ dhammaṃ sutvāna, devalokaṃ agacchahaṃ;

Tiṃsakappāni devesu, avasiṃ tatthahaṃ pure.

14.

‘‘Ekattiṃse ito kappe, yaṃ saññamalabhiṃ tadā;

Duggatiṃ nābhijānāmi, saccasaññāyidaṃ phalaṃ.

15.

‘‘Chabbīsamhi ito kappe, eko āsiṃ janādhipo;

Ekaphusitanāmena, cakkavattī mahabbalo.

16.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā saccasaññako thero imā gāthāyo abhāsitthāti.

Saccasaññakattherassāpadānaṃ tatiyaṃ.

4. Ekasaññakattheraapadānaṃ

17.

‘‘Dumagge paṃsukūlikaṃ [paṃsukūlakaṃ (?)], laggaṃ disvāna satthuno;

Añjaliṃ paggahetvāna, paṃsukūlaṃ avandahaṃ.

18.

‘‘Ekattiṃse ito kappe, yaṃ saññamalabhiṃ tadā;

Duggatiṃ nābhijānāmi, buddhapūjāyidaṃ phalaṃ.

19.

‘‘Pañcavīse ito kappe, eko āsiṃ janādhipo;

Amitābhoti nāmena, cakkavattī mahabbalo.

20.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā ekasaññako thero imā gāthāyo abhāsitthāti.

Ekasaññakattherassāpadānaṃ catutthaṃ.

5. Raṃsisaññakattheraapadānaṃ

21.

‘‘Udentaṃ sataraṃsiṃva, pītaraṃsiṃva [sitaraṃsiṃ va (sī. syā.)] bhāṇumaṃ;

Byagghūsabhaṃva pavaraṃ, sujātaṃ pabbatantare.

22.

‘‘Buddhassa ānubhāvo so, jalate pabbatantare;

Raṃse [raṃsyā (?)] cittaṃ pasādetvā, kappaṃ saggamhi modahaṃ.

23.

‘‘Avasesesu kappesu, kusalaṃ caritaṃ mayā;

Tena cittappasādena, buddhānussatiyāpi ca.

24.

‘‘Tiṃsakappasahasseto, yaṃ saññamalabhiṃ tadā;

Duggatiṃ nābhijānāmi, buddhasaññāyidaṃ phalaṃ.

25.

‘‘Sattapaññāsakappamhi, eko āsiṃ janādhipo;

Sujāto nāma nāmena, cakkavattī mahabbalo.

26.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā raṃsisaññako thero imā gāthāyo abhāsitthāti.

Raṃsisaññakattherassāpadānaṃ pañcamaṃ.

6. Sandhitattheraapadānaṃ

27.

‘‘Assatthe haritobhāse, saṃvirūḷhamhi pādape;

Ekaṃ buddhagataṃ saññaṃ, alabhiṃhaṃ [alabhissaṃ (sī.)] patissato.

28.

‘‘Ekattiṃse ito kappe, yaṃ saññamalabhiṃ tadā;

Tassā saññāya vāhasā, patto me āsavakkhayo.

29.

‘‘Ito terasakappamhi, dhaniṭṭho nāma khattiyo;

Sattaratanasampanno, cakkavattī mahabbalo.

30.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sandhito [saṇṭhito (sī.)] thero imā gāthāyo abhāsitthāti.

Sandhitattherassāpadānaṃ chaṭṭhaṃ.

7. Tālavaṇṭadāyakattheraapadānaṃ

31.

‘‘Tālavaṇṭaṃ mayā dinnaṃ, tissassādiccabandhuno;

Gimhanibbāpanatthāya, pariḷāhopasantiyā.

32.

‘‘Sannibbāpemi rāgaggiṃ, dosaggiñca taduttariṃ;

Nibbāpemi ca mohaggiṃ, tālavaṇṭassidaṃ phalaṃ.

33.

‘‘Kilesā jhāpitā mayhaṃ, bhavā sabbe samūhatā;

Dhāremi antimaṃ dehaṃ, sammāsambuddhasāsane.

34.

‘‘Dvenavute ito kappe, yaṃ kammamakariṃ tadā;

Duggatiṃ nābhijānāmi, tālavaṇṭassidaṃ phalaṃ.

35.

‘‘Tesaṭṭhimhi ito kappe, mahānāmasanāmako;

Sattaratanasampanno, cakkavattī mahabbalo.

36.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā tālavaṇṭadāyako thero imā gāthāyo abhāsitthāti.

Tālavaṇṭadāyakattherassāpadānaṃ sattamaṃ.

8. Akkantasaññakattheraapadānaṃ

37.

‘‘Kusāṭakaṃ gahetvāna, upajjhāyassahaṃ pure;

Mantañca anusikkhāmi, ganthādosassa [kaṇḍabhedassa (sī.), gaṇḍabhedassa (syā.)] pattiyā.

38.

‘‘Addasaṃ virajaṃ buddhaṃ, āhutīnaṃ paṭiggahaṃ;

Usabhaṃ pavaraṃ aggaṃ, tissaṃ buddhaṃ gaṇuttamaṃ [gajuttamaṃ (syā.)].

39.

‘‘Kusāṭakaṃ pattharitaṃ, akkamantaṃ naruttamaṃ;

Samuggataṃ mahāvīraṃ, lokajeṭṭhaṃ narāsabhaṃ.

40.

‘‘Disvā taṃ lokapajjotaṃ, vimalaṃ candasannibhaṃ;

Avandiṃ satthuno pāde, vippasannena cetasā.

41.

‘‘Catunnavutito kappe, yaṃ adāsiṃ kusāṭakaṃ;

Duggatiṃ nābhijānāmi, kusāṭakassidaṃ phalaṃ.

42.

‘‘Sattatiṃse ito kappe, eko āsiṃ janādhipo;

Sunando nāma nāmena, cakkavattī mahabbalo.

43.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā akkantasaññako thero imā gāthāyo abhāsitthāti;

Akkantasaññakattherassāpadānaṃ aṭṭhamaṃ.

9. Sappidāyakattheraapadānaṃ

44.

‘‘Nisinno pāsādavare, nārīgaṇapurakkhato;

Byādhitaṃ samaṇaṃ disvā, abhināmesahaṃ gharaṃ.

45.

‘‘Upaviṭṭhaṃ mahāvīraṃ, devadevaṃ narāsabhaṃ;

Sappitelaṃ mayā dinnaṃ, siddhatthassa mahesino.

46.

‘‘Passaddhadarathaṃ disvā, vippasannamukhindriyaṃ;

Vanditvā satthuno pāde, anusaṃsāvayiṃ pure.

47.

‘‘Disvā maṃ suppasannattaṃ [suppasannantaṃ (syā. ka.) suppasannacittanti attho], iddhiyā pāramiṅgato;

Nabhaṃ abbhuggamī dhīro, haṃsarājāva ambare.

48.

‘‘Catunnavutito kappe, yaṃ dānamadadiṃ tadā;

Duggatiṃ nābhijānāmi, sappitelassidaṃ phalaṃ.

49.

‘‘Ito sattarase kappe, jutideva [dutideva (syā.), tutideva (ka.)] sanāmako;

Sattaratanasampanno, cakkavattī mahabbalo.

50.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sappidāyako thero imā gāthāyo abhāsitthāti.

Sappidāyakattherassāpadānaṃ navamaṃ.

10. Pāpanivāriyattheraapadānaṃ

51.

‘‘Piyadassissa bhagavato, caṅkamaṃ sodhitaṃ mayā;

Naḷakehi paṭicchannaṃ, vātātapanivāraṇaṃ.

52.

‘‘Pāpaṃ vivajjanatthāya, kusalassupasampadā;

Kilesānaṃ pahānāya, padahiṃ satthu sāsane.

53.

‘‘Ito ekādase kappe, aggidevoti vissuto;

Sattaratanasampanno, cakkavattī mahabbalo.

54.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā pāpanivāriyo [vātātapanivāriyo (?)] thero imā gāthāyo abhāsitthāti.

Pāpanivāriyattherassāpadānaṃ dasamaṃ.

Hatthivaggo bāvīsatimo.

Tassuddānaṃ –

Hatthi pānadhi saccañca, ekasaññi ca raṃsiko;

Sandhito tālavaṇṭañca, tathā akkantasaññako;

Sappi pāpanivārī ca, catuppaññāsa gāthakāti.

 

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

 

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)