2. Sīhāsaniyavaggo

2. Sīhāsaniyavaggo

open all | close all

1. Sīhāsanadāyakattheraapadānaṃ

1.

‘‘Nibbute lokanāthamhi, siddhatthe dvipaduttame [dipaduttame (sī. syā.)];

Vitthārike pāvacane, bāhujaññamhi sāsane.

2.

‘‘Pasannacitto sumano, sīhāsanamakāsahaṃ;

Sīhāsanaṃ karitvāna, pādapīṭhamakāsahaṃ.

3.

‘‘Sīhāsane ca vassante, gharaṃ tattha akāsahaṃ;

Tena cittappasādena, tusitaṃ upapajjahaṃ.

4.

‘‘Āyāmena catubbīsa, yojanaṃ āsi [yojanāsiṃsu (syā. ka.)] tāvade;

Vimānaṃ sukataṃ mayhaṃ, vitthārena catuddasa.

5.

‘‘Sataṃ [satta (syā.)] kaññāsahassāni, parivārenti maṃ sadā;

Soṇṇamayañca pallaṅkaṃ, byamhe āsi sunimmitaṃ.

6.

‘‘Hatthiyānaṃ assayānaṃ, dibbayānaṃ upaṭṭhitaṃ;

Pāsādā sivikā ceva, nibbattanti yadicchakaṃ.

7.

‘‘Maṇimayā ca pallaṅkā, aññe sāramayā bahū;

Nibbattanti mamaṃ sabbe, sīhāsanassidaṃ phalaṃ.

8.

‘‘Soṇṇamayā rūpimayā, phalikāveḷuriyāmayā;

Pādukā abhirūhāmi, pādapīṭhassidaṃ phalaṃ.

9.

‘‘Catunnavutito [catunavute ito (sī. syā.)] kappe, yaṃ kammamakariṃ tadā;

Duggatiṃ nābhijānāmi, puññakammassidaṃ phalaṃ.

10.

‘‘Tesattatimhito kappe, indanāmā tayo janā;

Dvesattatimhito kappe, tayo sumananāmakā.

11.

‘‘Samasattatito kappe, tayo varuṇanāmakā;

Sattaratanasampannā, catudīpamhi issarā.

12.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā sīhāsanadāyako thero imā gāthāyo abhāsitthāti.

Sīhāsanadāyakattherassāpadānaṃ paṭhamaṃ.

2. Ekatthambhikattheraapadānaṃ

13.

‘‘Siddhatthassa bhagavato, mahāpūgagaṇo ahu;

Saraṇaṃ gatā ca te buddhaṃ, saddahanti tathāgataṃ.

14.

‘‘Sabbe saṅgamma mantetvā, māḷaṃ kubbanti satthuno;

Ekatthambhaṃ alabhantā, vicinanti brahāvane.

15.

‘‘Tehaṃ araññe disvāna, upagamma gaṇaṃ tadā;

Añjaliṃ paggahetvāna, paripucchiṃ gaṇaṃ ahaṃ.

16.

‘‘Te me puṭṭhā viyākaṃsu, sīlavanto upāsakā;

Māḷaṃ mayaṃ kattukāmā, ekatthambho na labbhati.

17.

‘‘Ekatthambhaṃ mamaṃ detha, ahaṃ dassāmi satthuno;

Āharissāmahaṃ thambhaṃ, appossukkā bhavantu te [bhavantu vo (sī.), bhavātha vo (?)].

18.

‘‘Te me thambhaṃ pavecchiṃsu, pasannā tuṭṭhamānasā;

Tato paṭinivattitvā, agamaṃsu sakaṃ gharaṃ.

19.

‘‘Aciraṃ gate pūgagaṇe, thambhaṃ ahāsahaṃ tadā;

Haṭṭho haṭṭhena cittena, paṭhamaṃ ussapesahaṃ.

20.

‘‘Tena cittappasādena, vimānaṃ upapajjahaṃ;

Ubbiddhaṃ bhavanaṃ mayhaṃ, sattabhūmaṃ [satabhūmaṃ (sī. ka.)] samuggataṃ.

21.

‘‘Vajjamānāsu bherīsu, paricāremahaṃ sadā;

Pañcapaññāsakappamhi, rājā āsiṃ yasodharo.

22.

‘‘Tatthāpi bhavanaṃ mayhaṃ, sattabhūmaṃ samuggataṃ;

Kūṭāgāravarūpetaṃ, ekatthambhaṃ manoramaṃ.

23.

‘‘Ekavīsatikappamhi, udeno nāma khattiyo;

Tatrāpi bhavanaṃ mayhaṃ, sattabhūmaṃ samuggataṃ.

24.

‘‘Yaṃ yaṃ yonupapajjāmi, devattaṃ atha mānusaṃ;

Anubhomi sukhaṃ sabbaṃ [sabbametaṃ (syā.)], ekatthambhassidaṃ phalaṃ.

25.

‘‘Catunnavutito kappe, yaṃ thambhamadadaṃ tadā;

Duggatiṃ nābhijānāmi, ekatthambhassidaṃ phalaṃ.

26.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā ekatthambhiko thero imā gāthāyo abhāsitthāti.

Ekatthambhikattherassāpadānaṃ dutiyaṃ.

3. Nandattheraapadānaṃ

27.

‘‘Padumuttarassa bhagavato, lokajeṭṭhassa tādino;

Vatthaṃ khomaṃ mayā dinnaṃ, sayambhussa mahesino.

28.

‘‘Taṃ me buddho viyākāsi, jalajuttaranāmako;

‘Iminā vatthadānena, hemavaṇṇo bhavissasi.

29.

‘‘‘Dve sampattī anubhotvā, kusalamūlehi codito;

Gotamassa bhagavato, kaniṭṭho tvaṃ bhavissasi.

30.

‘‘‘Rāgaratto sukhasīlo, kāmesu gedhamāyuto;

Buddhena codito santo, tadā [tato (syā.)] tvaṃ pabbajissasi.

31.

‘‘‘Pabbajitvāna tvaṃ tattha, kusalamūlena codito;

Sabbāsave pariññāya, nibbāyissasināsavo’.

32.

‘‘Satta [sata (syā.)] kappasahassamhi, caturo ceḷanāmakā;

Saṭṭhi kappasahassamhi, upacelā catujjanā.

33.

‘‘Pañca kappasahassamhi, ceḷāva caturo janā;

Sattaratanasampannā, catudīpamhi issarā.

34.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā nando thero imā gāthāyo abhāsitthāti.

Nandattherassāpadānaṃ tatiyaṃ.

4. Cūḷapanthakattheraapadānaṃ

35.

‘‘Padumuttaro nāma jino, āhutīnaṃ paṭiggaho;

Gaṇamhā vūpakaṭṭho so, himavante vasī tadā.

36.

‘‘Ahampi himavantamhi, vasāmi assame tadā;

Acirāgataṃ mahāvīraṃ, upesiṃ lokanāyakaṃ.

37.

‘‘Pupphacchattaṃ gahetvāna, upagacchiṃ narāsabhaṃ;

Samādhiṃ samāpajjantaṃ, antarāyamakāsahaṃ.

38.

‘‘Ubho hatthehi paggayha, pupphacchattaṃ adāsahaṃ;

Paṭiggahesi bhagavā, padumuttaro mahāmuni.

39.

‘‘Sabbe devā attamanā, himavantaṃ upenti te;

Sādhukāraṃ pavattesuṃ, anumodissati cakkhumā.

40.

‘‘Idaṃ vatvāna te devā, upagacchuṃ naruttamaṃ;

Ākāse dhārayantassa [dhārayantaṃ me (ka), dhārayato me (?)], padumacchattamuttamaṃ.

41.

‘‘Satapattachattaṃ paggayha, adāsi tāpaso mama;

‘Tamahaṃ kittayissāmi, suṇātha mama bhāsato.

42.

‘‘‘Pañcavīsatikappāni, devarajjaṃ karissati;

Catuttiṃsatikkhattuñca, cakkavattī bhavissati.

43.

‘‘‘Yaṃ yaṃ yoniṃ saṃsarati, devattaṃ atha mānusaṃ;

Abbhokāse patiṭṭhantaṃ, padumaṃ dhārayissati’.

44.

‘‘Kappasatasahassamhi, okkākakulasambhavo;

Gotamo nāma gottena [nāmena (sī. ka.)], satthā loke bhavissati.

45.

‘‘‘Pakāsite pāvacane, manussattaṃ labhissati;

Manomayamhi kāyamhi, uttamo so bhavissati.

46.

‘‘‘Dve bhātaro bhavissanti, ubhopi panthakavhayā;

Anubhotvā uttamatthaṃ, jotayissanti sāsanaṃ’.

47.

‘‘Sohaṃ aṭṭhārasavasso [so aṭṭhārasavassohaṃ (syā.)], pabbajiṃ anagāriyaṃ;

Visesāhaṃ na vindāmi, sakyaputtassa sāsane.

48.

‘‘Dandhā mayhaṃ gatī āsi, paribhūto pure ahuṃ [ahaṃ (syā.)];

Bhātā ca maṃ paṇāmesi, gaccha dāni sakaṃ gharaṃ.

49.

‘‘Sohaṃ paṇāmito santo, saṅghārāmassa koṭṭhake;

Dummano tattha aṭṭhāsiṃ, sāmaññasmiṃ apekkhavā.

50.

‘‘Bhagavā tattha [athettha satthā (sī. syā.)] āgacchi, sīsaṃ mayhaṃ parāmasi;

Bāhāya maṃ gahetvāna, saṅghārāmaṃ pavesayi.

51.

‘‘Anukampāya me satthā, adāsi pādapuñchaniṃ;

Evaṃ suddhaṃ adhiṭṭhehi, ekamantamadhiṭṭhahaṃ.

52.

‘‘Hatthehi tamahaṃ gayha, sariṃ kokanadaṃ ahaṃ;

Tattha cittaṃ vimucci me, arahattaṃ apāpuṇiṃ.

53.

‘‘Manomayesu kāyesu, sabbattha pāramiṃ gato;

Sabbāsave pariññāya, viharāmi anāsavo.

54.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā cūḷapanthako [cullapanthako (sī. syā.)] thero imā gāthāyo abhāsitthāti.

Cūḷapanthakattherassāpadānaṃ catutthaṃ.

5. Pilindavacchattheraapadānaṃ

55.

‘‘Nibbute lokanāthamhi, sumedhe aggapuggale;

Pasannacitto sumano, thūpapūjaṃ akāsahaṃ.

56.

‘‘Ye ca khīṇāsavā tattha, chaḷabhiññā mahiddhikā;

Tehaṃ tattha samānetvā, saṅghabhattaṃ akāsahaṃ.

57.

‘‘Sumedhassa bhagavato, upaṭṭhāko tadā ahu;

Sumedho nāma nāmena, anumodittha so tadā.

58.

‘‘Tena cittappasādena, vimānaṃ upapajjahaṃ;

Chaḷāsītisahassāni, accharāyo ramiṃsu me.

59.

‘‘Mameva anuvattanti, sabbakāmehi tā sadā;

Aññe deve abhibhomi, puññakammassidaṃ phalaṃ.

60.

‘‘Pañcavīsatikappamhi, varuṇo nāma khattiyo;

Visuddhabhojano [susuddhabhojano (sī.)] āsiṃ, cakkavattī ahaṃ tadā.

61.

‘‘Na te bījaṃ pavapanti, napi nīyanti naṅgalā;

Akaṭṭhapākimaṃ sāliṃ, paribhuñjanti mānusā.

62.

‘‘Tattha rajjaṃ karitvāna, devattaṃ puna gacchahaṃ;

Tadāpi edisā mayhaṃ, nibbattā bhogasampadā.

63.

‘‘Na maṃ mittā amittā vā, hiṃsanti sabbapāṇino;

Sabbesampi piyo homi, puññakammassidaṃ phalaṃ.

64.

‘‘Tiṃsakappasahassamhi , yaṃ dānamadadiṃ tadā;

Duggatiṃ nābhijānāmi, gandhālepassidaṃ phalaṃ.

65.

‘‘Imasmiṃ bhaddake kappe, eko āsiṃ janādhipo;

Mahānubhāvo rājāhaṃ [rājīsi (syā. ka.)], cakkavattī mahabbalo.

66.

‘‘Sohaṃ pañcasu sīlesu, ṭhapetvā janataṃ bahuṃ;

Pāpetvā sugatiṃyeva, devatānaṃ piyo ahuṃ.

67.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā pilindavaccho [pilindivaccho (sī.)] thero imā gāthāyo abhāsitthāti.

Pilindavacchattherassāpadānaṃ pañcamaṃ.

6. Rāhulattheraapadānaṃ

68.

‘‘Padumuttarassa bhagavato, lokajeṭṭhassa tādino;

Sattabhūmamhi pāsāde, ādāsaṃ santhariṃ ahaṃ.

69.

‘‘Khīṇāsavasahassehi, parikiṇṇo mahāmuni;

Upāgami gandhakuṭiṃ, dvipadindo [dipadindo (sī. syā.)] narāsabho.

70.

‘‘Virocento [virocayaṃ (syā.)] gandhakuṭiṃ, devadevo narāsabho;

Bhikkhusaṅghe ṭhito satthā, imā gāthā abhāsatha.

71.

‘‘‘Yenāyaṃ jotitā seyyā, ādāsova susanthato;

Tamahaṃ kittayissāmi, suṇātha mama bhāsato.

72.

‘‘‘Soṇṇamayā rūpimayā, atho veḷuriyāmayā;

Nibbattissanti pāsādā, ye keci manaso piyā.

73.

‘‘‘Catusaṭṭhikkhattuṃ devindo, devarajjaṃ karissati;

Sahassakkhattuṃ cakkavattī, bhavissati anantarā.

74.

‘‘‘Ekavīsatikappamhi, vimalo nāma khattiyo;

Cāturanto vijitāvī, cakkavattī bhavissati.

75.

‘‘‘Nagaraṃ reṇuvatī nāma, iṭṭhakāhi sumāpitaṃ;

Āyāmato tīṇi sataṃ, caturassasamāyutaṃ.

76.

‘‘‘Sudassano nāma pāsādo, vissakammena māpito [visukammena§māpito (ka.), vissakammena nimmito (sī.)];

Kūṭāgāravarūpeto, sattaratanabhūsito.

77.

‘‘‘Dasasaddāvivittaṃ taṃ [avivittaṃ (sī.)], vijjādharasamākulaṃ;

Sudassanaṃva nagaraṃ, devatānaṃ bhavissati.

78.

‘‘‘Pabhā niggacchate tassa, uggacchanteva sūriye;

Virocessati taṃ niccaṃ, samantā aṭṭhayojanaṃ.

79.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

80.

‘‘‘Tusitā so cavitvāna, sukkamūlena codito;

Gotamassa bhagavato, atrajo so bhavissati.

81.

‘‘‘Sace vaseyya [sacā’vaseyya (?)] agāraṃ, cakkavattī bhaveyya so;

Aṭṭhānametaṃ yaṃ tādī, agāre ratimajjhagā.

82.

‘‘‘Nikkhamitvā agāramhā, pabbajissati subbato;

Rāhulo nāma nāmena, arahā so bhavissati’.

83.

‘‘Kikīva aṇḍaṃ rakkheyya, cāmarī viya vāladhiṃ;

Nipako sīlasampanno, mamaṃ rakkhi mahāmuni [evaṃ rakkhiṃ mahāmuni (sī. ka.), mamaṃ dakkhi mahāmuni (syā.)].

84.

‘‘Tassāhaṃ dhammamaññāya, vihāsiṃ sāsane rato;

Sabbāsave pariññāya, viharāmi anāsavo.

85.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā rāhulo thero imā gāthāyo abhāsitthāti.

Rāhulattherassāpadānaṃ chaṭṭhaṃ.

7. Upasenavaṅgantaputtattheraapadānaṃ

86.

‘‘Padumuttaraṃ bhagavantaṃ, lokajeṭṭhaṃ narāsabhaṃ;

Pabbhāramhi nisīdantaṃ, upagacchiṃ naruttamaṃ.

87.

‘‘Kaṇikārapupphaṃ [kaṇikāraṃ pupphitaṃ (sī. syā.)] disvā, vaṇṭe chetvānahaṃ tadā;

Alaṅkaritvā chattamhi, buddhassa abhiropayiṃ.

88.

‘‘Piṇḍapātañca pādāsiṃ, paramannaṃ subhojanaṃ;

Buddhena navame tattha, samaṇe aṭṭha bhojayiṃ.

89.

‘‘Anumodi mahāvīro, sayambhū aggapuggalo;

Iminā chattadānena, paramannapavecchanā.

90.

‘‘Tena cittappasādena, sampattimanubhossasi;

Chattiṃsakkhattuṃ devindo, devarajjaṃ karissati.

91.

‘‘Ekavīsatikkhattuñca, cakkavattī bhavissati;

Padesarajjaṃ vipulaṃ, gaṇanāto asaṅkhiyaṃ.

92.

‘‘Satasahassito kappe, okkākakulasambhavo;

Gotamo nāma gottena, satthā loke bhavissati [yaṃ vadanti sumedhoti, bhūripaññaṃ sumedhasaṃ; kappeto satasahasse, esa buddho bhavissati; (ka.)].

93.

‘‘Sāsane dibbamānamhi, manussattaṃ gamissati;

Tassa dhammesu dāyādo, oraso dhammanimmito.

94.

‘‘Upasenoti nāmena, hessati satthu sāvako;

[idaṃ pādadvayaṃ theragāthāaṭṭhakathāyameva dissati] Samantapāsādikattā, aggaṭṭhāne ṭhapessati

[idaṃ pādadvayaṃ theragāthāaṭṭhakathāyameva dissati].

95.

‘‘Carimaṃ vattate mayhaṃ, bhavā sabbe samūhatā;

Dhāremi antimaṃ dehaṃ, jetvā māraṃ savāhanaṃ [savāhiniṃ (?)].

96.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā upaseno vaṅgantaputto thero imā gāthāyo abhāsitthāti.

Upasenavaṅgantaputtattherassāpadānaṃ sattamaṃ.

Tatiyabhāṇavāraṃ.

8. Raṭṭhapālattheraapadānaṃ

97.

‘‘Padumuttarassa bhagavato, lokajeṭṭhassa tādino;

Varanāgo mayā dinno, īsādanto urūḷhavā.

98.

‘‘Setacchatto pasobhito, sakappano sahatthipo;

Agghāpetvāna taṃ sabbaṃ, saṅghārāmaṃ akārayiṃ.

99.

‘‘Catupaññāsasahassāni, pāsāde kārayiṃ ahaṃ;

Mahoghadānaṃ [mahābhattaṃ (sī.), mahoghañca (ka.), mahādānaṃ (?)] karitvāna, niyyādesiṃ mahesino.

100.

‘‘Anumodi mahāvīro, sayambhū aggapuggalo;

Sabbe jane hāsayanto, desesi amataṃ padaṃ.

101.

‘‘Taṃ me buddho viyākāsi, jalajuttaranāmako;

Bhikkhusaṅghe nisīditvā, imā gāthā abhāsatha.

102.

‘‘‘Catupaññāsasahassāni, pāsāde kārayī ayaṃ;

Kathayissāmi vipākaṃ, suṇotha mama bhāsato.

103.

‘‘‘Aṭṭhārasasahassāni, kūṭāgārā bhavissare;

Byamhuttamamhi nibbattā, sabbasoṇṇamayā ca te.

104.

‘‘‘Paññāsakkhattuṃ devindo, devarajjaṃ karissati;

Aṭṭhapaññāsakkhattuñca, cakkavattī bhavissati.

105.

‘‘‘Kappasatasahassamhi, okkākakulasambhavo;

Gotamo nāma gottena, satthā loke bhavissati.

106.

‘‘‘Devalokā cavitvāna, sukkamūlena codito;

Aḍḍhe kule mahābhoge, nibbattissati tāvade.

107.

‘‘‘So pacchā pabbajitvāna, sukkamūlena codito;

Raṭṭhapāloti nāmena, hessati satthu sāvako.

108.

‘‘‘Padhānapahitatto so, upasanto nirūpadhi;

Sabbāsave pariññāya, nibbāyissatināsavo’.

109.

‘‘Uṭṭhāya abhinikkhamma, jahitā bhogasampadā;

Kheḷapiṇḍeva bhogamhi, pemaṃ mayhaṃ na vijjati.

110.

‘‘Vīriyaṃ me dhuradhorayhaṃ, yogakkhemādhivāhanaṃ;

Dhāremi antimaṃ dehaṃ, sammāsambuddhasāsane.

111.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā raṭṭhapālo thero imā gāthāyo abhāsitthāti.

Raṭṭhapālattherassāpadānaṃ aṭṭhamaṃ.

9. Sopākattheraapadānaṃ

112.

‘‘Pabbhāraṃ sodhayantassa [sevayantassa (sī. ka.)], vipine pabbatuttame;

Siddhattho nāma bhagavā, āgacchi mama santikaṃ.

113.

‘‘Buddhaṃ upagataṃ disvā, lokajeṭṭhassa tādino;

Santharaṃ santharitvāna [paññapetvāna (syā. aṭṭha)], pupphāsanamadāsahaṃ.

114.

‘‘Pupphāsane nisīditvā, siddhattho lokanāyako;

Mamañca gatimaññāya, aniccatamudāhari.

115.

‘‘‘Aniccā vata saṅkhārā, uppādavayadhammino;

Uppajjitvā nirujjhanti, tesaṃ vūpasamo sukho’.

116.

‘‘Idaṃ vatvāna sabbaññū, lokajeṭṭho narāsabho;

Nabhaṃ abbhuggami vīro, haṃsarājāva ambare.

117.

‘‘Sakaṃ diṭṭhiṃ jahitvāna, bhāvayāniccasaññahaṃ;

Ekāhaṃ bhāvayitvāna, tattha kālaṃ kato ahaṃ.

118.

‘‘Dve sampattī anubhotvā, sukkamūlena codito;

Pacchime bhave sampatte, sapākayonupāgamiṃ.

119.

‘‘Agārā abhinikkhamma, pabbajiṃ anagāriyaṃ;

Jātiyā sattavassohaṃ, arahattamapāpuṇiṃ.

120.

‘‘Āraddhavīriyo pahitatto, sīlesu susamāhito;

Tosetvāna mahānāgaṃ, alatthaṃ upasampadaṃ.

121.

‘‘Catunnavutito kappe, yaṃ kammamakariṃ tadā;

Duggatiṃ nābhijānāmi, pupphadānassidaṃ phalaṃ.

122.

‘‘Catunnavutito kappe, yaṃ saññaṃ bhāvayiṃ tadā;

Taṃ saññaṃ bhāvayantassa, patto me āsavakkhayo.

123.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā sopāko thero imā gāthāyo abhāsitthāti.

Sopākattherassāpadānaṃ navamaṃ.

10. Sumaṅgalattheraapadānaṃ

124.

‘‘Āhutiṃ yiṭṭhukāmohaṃ, paṭiyādetvāna bhojanaṃ;

Brāhmaṇe paṭimānento, visāle māḷake ṭhito.

125.

‘‘Athaddasāsiṃ sambuddhaṃ, piyadassiṃ mahāyasaṃ;

Sabbalokavinetāraṃ, sayambhuṃ aggapuggalaṃ.

126.

‘‘Bhagavantaṃ jutimantaṃ, sāvakehi purakkhataṃ;

Ādiccamiva rocantaṃ, rathiyaṃ paṭipannakaṃ.

127.

‘‘Añjaliṃ paggahetvāna, sakaṃ cittaṃ pasādayiṃ;

Manasāva nimantesiṃ, ‘āgacchatu mahāmuni’.

128.

‘‘Mama saṅkappamaññāya, satthā loke anuttaro;

Khīṇāsavasahassehi, mama dvāraṃ upāgami.

129.

‘‘Namo te purisājañña, namo te purisuttama;

Pāsādaṃ abhirūhitvā, sīhāsane nisīdataṃ [nisīda tvaṃ (sī.)].

130.

‘‘Danto dantaparivāro, tiṇṇo tārayataṃ varo;

Pāsādaṃ abhirūhitvā, nisīdi pavarāsane.

131.

‘‘Yaṃ me atthi sake gehe, āmisaṃ paccupaṭṭhitaṃ;

Tāhaṃ buddhassa pādāsiṃ, pasanno sehi pāṇibhi.

132.

‘‘Pasannacitto sumano, vedajāto katañjalī;

Buddhaseṭṭhaṃ namassāmi, aho buddhassuḷāratā.

133.

‘‘Aṭṭhannaṃ payirūpāsataṃ, bhuñjaṃ khīṇāsavā bahū;

Tuyheveso ānubhāvo, saraṇaṃ taṃ upemahaṃ.

134.

‘‘Piyadassī ca bhagavā, lokajeṭṭho narāsabho;

Bhikkhusaṅghe nisīditvā, imā gāthā abhāsatha.

135.

‘‘‘Yo so saṅghaṃ abhojesi, ujubhūtaṃ samāhitaṃ;

Tathāgatañca sambuddhaṃ, suṇātha mama bhāsato.

136.

‘‘‘Sattavīsatikkhattuṃ so, devarajjaṃ karissati;

Sakakammābhiraddho so, devaloke ramissati.

137.

‘‘‘Dasa aṭṭha cakkhattuṃ [dasañcaṭṭhakkhatthuṃ (sī.), dasa caṭṭhakkhattuṃ (syā.)] so, cakkavattī bhavissati;

Pathabyā rajjaṃ pañcasataṃ, vasudhaṃ āvasissati’.

138.

‘‘Araññavanamoggayha, kānanaṃ byagghasevitaṃ;

Padhānaṃ padahitvāna, kilesā jhāpitā mayā.

139.

‘‘Aṭṭhārase kappasate, yaṃ dānamadadiṃ tadā;

Duggatiṃ nābhijānāmi, bhattadānassidaṃ phalaṃ.

140.

‘‘Paṭisambhidā catasso, vimokkhāpi ca aṭṭhime;

Chaḷabhiññā sacchikatā, kataṃ buddhassa sāsanaṃ’’.

Itthaṃ sudaṃ āyasmā sumaṅgalo thero imā gāthāyo abhāsitthāti.

Sumaṅgalattherassāpadānaṃ dasamaṃ.

Tassuddānaṃ –

Sīhāsanī ekathambhī, nando ca cūḷapanthako;

Pilindarāhulo ceva, vaṅganto raṭṭhapālako.

Sopāko maṅgalo ceva, daseva dutiye vagge;

Satañca aṭṭhatiṃsa ca, gāthā cettha pakāsitā.

Sīhāsaniyavaggo dutiyo.

 

* Bài viết trích trong Khuddakanikāya >> Suttapiṭaka >> Tipiṭaka (Mūla), nguồn Tipitaka.org. Tải sách PDF tại đây.

TẢI MOBILE APP PHẬT GIÁO THERAVĀDA ĐỂ XEM THÊM NHIỀU THÔNG TIN HỮU ÍCH (ANDROID & IOS)